Pat Kenny
Ón Vicipéid, an chiclipéid shaor.
Is é Pat Kenny láithreoir an chláir teilifíse Éireannach The Late Late Show. Tá clú agus cáil ar an chlár cainte seo, a chraoltar ar Radio Telefís Éireann, mar an clár cainte is faide ar siúl ar domhan.
Cáilíodh Kenny mar innealtóir ceimiceach agus thosaigh sé a shlí bheatha ag obair mar bholscaire leanúnachais (an duine a bhíonn le cloisteáil ag tús agus deireadh cláir) ar raidió RTÉ i lár na seachtóidí. Rinne sé botún ollmhór dodhearmadta go luath ina shlí bheatha. Bhí RTÉ ag craoladh ceol sollúnta tar éis bhás an iar-uachtaráin agus ceannaire an Éirí Amach, Eamon de Valera, agus léigh Kenny amach teideal píosa ceoil thraidisiúnta Éireannach darbh ainm 'The ol' divil is dead’.
Thosaigh Kenny ag obair sa teilifís le RTÉ mar dhuine de na láithreoirí ar an chlár cúrsaí reatha Today Tonight a chraoltaí trí huaire sa tseachtain i lár na n-ochtóidí. Tugadh clár cainte dó nár mhair ach séasúr amháin, agus ansin bhí sé mar aoi-láithreoir ar an chlár cainte Saturday Live. Rinneadh cinneadh ina dhiaidh sin an jab a thabhairt do Kenny amháin, agus athraíodh ainm an chláir go Kenny Live. Leis an athrú sin, thosaigh iomaíocht ghéar idir an seó Kenny Live, a chraoltaí ar an Satharn, agus an Late Late Show, a chraoltaí ar an Aoine. Cé go ndúirt Gay Byrne, duine de na láithreoirí cláir cainte is mó taithí, agus Kenny go poiblí go raibh an-mheas acu ar a chéile, agus go raibh an dá chlár dírithe ar lucht éisteachta a bhí go hiomlán difriúil, bhí foirne an dá chlár i gcónaí i gcomórtas lena chéile.
Nuair a d'éirigh Byrne as a phost mar láithreoir an Late Late Show i 1999, tugadh an post do Kenny, cé gur chuir criticeoirí in iúl gur mheas siad nach mbeadh pearsantacht Kenny oiriúnach le haghaidh an Late Late.
Go dtí seo, ní mheastar go bhfuil ag éirí go maith le Kenny mar láithreoir an Late Late Show. Cé go bhfuil lucht féachana ollmhór ag an seó, tá an trian acu caillte ó d'imigh Byrne. Tá iarracht déanta athnuachan a dhéanamh ar an chlár: tá an ceol aithnidiúil agus an stíl fhísiúil athraithe go ceol agus stíl a thaitníonn le Kenny, mar shampla. Chonacthas Byrne mar dhuine a bhí in ann gach rud a phlé le féith an ghrinn gan an dáiríreacht a chailliúint. Ach in ainneoin an mhéid taithí iriseoireachta atá ag Kenny agus go bhfuil sé sármhaith le cúrsaí dáiríre, ní bhíonn sé ar a shuaimhneas i gceart agus deirtear go bhfuil cuma wooden air agus go mbíonn sé ródhíograiseach agus é ag caint faoi abhár níos éadroime.
