Tewdar
Dhiworth Wikipedia, an godhoniador rydh
Tewdar po Teudar (a-dro dhe 520 – a-dro dhe 580) o maghtern bretonek ha pennsevik kernewek y'n Oesow Kres a-varr.
Yn lyenn Kernewek, ev yw turant ha pagan a bersekutya an sens kristyon a'n oes na. Rag ensampel, yn Bywnans Meryasek, y lys usi yn Menek, ha chassya Meryasek a-dhiworth Kernow a wra ev. Tormentorys pals yw arvethesigyon Tewdar y'n hwedhel ma, ha Mahomm ev a wordh. Yn Bywnans Ke, Tewdar a appos fydh Ke ow skornya dyskas an Trynses ha'n dineythyans gwyrgh.
War-lergh David Nash Ford,[1] tas Tewdar o Hoel Veur, noy an myghtern Arthur. Tewdar o divroys a'y wlaskor Kernow Vyghan yn Breten Vyghan gans Macliau, myghtern Venetens, hag ena selya y vyghternses yn Pennwydh ha Kerrier. Yn 577, Tewdar a fethas Macliau mes gasa y vreur Weroc war dron Venetens.
Furv Latin y hanow a via nepprys Teutharius, nepprys Theodoricus. An Frankyon a's galwa Thierry, ha'n Kembroyon Tewdr.
