Alfredo Stroessner
Vu Wikipedia, der fräier Enzyklopedie.
Den Alfredo Stroessner Matiauda (* 3. November 1912 zu Encarnación; † 16. August 2006 zu Brasília) war vun 1954 bis 1989 President an Diktator vu Paraguay. Virdru war hie Generol a Commandant en Chef an der paraguayanescher Arméi.
[Änneren] Liewen
Jong vun engem däitschen Immigrant, huet den Alfredo Stroessner mat 16 Joer seng militäresch Carrière ugefaangen, wou en et séier bis ganz uewe bruecht huet. 1953 gouf e Commandant en chef vun der Arméi.
De 6. Mee 1954 huet e sech un d'Muecht geputscht a blouf 35 Joer laang President. Mat senger Partei, der Colorado-Partei, déi op alle wichtege Posten hir Leit hat, huet hien d'Land gefouert a kontrolléiert. Aussepolitesch huet hie sech als strengen Antikommunist positionnéiert, sou dass em d'finanziell Ënnerstëtzung duerch d'USA sécher war. Onofhängeg Quelle schwätze vun enger 3.000 Leit, déi "verschwonne" sinn. Vill méi nach, déi net mat him d'accord waren, goufen an de Prisong gestach an do gefoltert. 2 Millioune Leit sinn an den Exil gaangen. De Stroessner hat dann och exzellent Relatioune mat deenen anere südamerikaneschen Diktaturen. Vill Nazien hu sech nom Zweete Weltkrich am Paraguay verkroch, dorënner och de Josef Mengele, Dokter zu Auschwitz.
Ee vun de gréisste Projeten ënnert dem Stroessner senger Herrschaft war de Bau vum Itaipú-Staudamm. Den 3. Februar 1989 gouf de Stroessner entmuecht an en ass a Brasilien an den Exil gaangen, fir enger Uklo wéinst Verletzung vun de Mënscherechter z'entgoen. Do ass en am Alter vun 93 Joer gestuerwen.
[Änneren] Literatur
- Carlos. R. Miranda: The Stroessner Era: Authoritarian Rule in Paraguay, Westview Pr, Juni 1990, Hartdeckel, (am Ament vergraff)
- Anibal Miranda: Stroessner, Miranda & Asociados, Asuncion, Paraguay, 2004.
