Tavira
Vu Wikipedia, der fräier Enzyklopedie.
Tavira ass eng Stad am Süde vu Portugal an der Provënz Algarve, am Distrikt Faro. Tavira läit am ëstlechen Deel vun der Provinz, am sougenannte "Sotavento", tëscht Faro an der spuenescher Grenz. D'Awunnerzuel ass knapps 20000.
Am Géigesaz zu de Stied an der westlecher Algarve läit Tavira net direkt beim Mier. D'Lagunelandschaft an Naturschutzgebitt "Ria Formosa", déi sech iwwert e groussen Deel vun der ëstlecher Algarveküst erstreckt, trennt d'Stad vum Mier of. Fir op d'Plage ze kommen, hëllt een an der Stad e Boot oder e klengt Scheff, vun deem een iwwert d'Ria Formosa bis op déi propper Plage "Ilha de Tavira" gefouert get.
Während d'Landwirtschaft an der Regioun nach emmer eng wichteg Plaz anhëllt, spillt awer den Tourismus zënter de leschten zwanzeg Joer déi gréisste Roll. Tavira ass trotzdem op ville Plazen nach ganz onberéiert vum Tourismus bliwwen, an et ass grad dat, wat déi meescht Touristen un der schéiner aler Stad esou schätzen. Par rapport zu den Tourismus Héichbuergen Albufeira a Qarteira, fir der nëmmen zwou ze nennen, ass Tavira praktesch guer net mat Héichhaiser an ellene Wunnbléck an Touristesiedlunge bebaut.
Zumools d'Alstad huet en eemolege portugisesche Charme virzeweisen, mat senge ville Kierchen (et sollen iwweregens déi meescht am ganze Portugal sinn) a klenge Plazen. Besonnesch interessant ass déi al Maarthal matzen am Zentrum, an deeër een zënter 3 Joer Butteker a Bistroe fënnt; de Maart selwer gouf an d'Peripherie ausgelagert.
Ausserdeem gëtt et eng wonnerschéin al réimesch Bréck iwwert de Floss Gilao, deen Tavira an zwou Halschenten trennt, an d'Stad mam Mier verbënnt. Speziell owes ass et derwäert fir sech do ze promenéiren. An zu gudder lescht nach déi mauresch Buerg, héich iwwert der Stad, vu wou een eng formidabel Vue iwwert déi ganz Géigend ka genéissen.
Tavira huet eng relativ gutt Infrastruktur a Verkéiersubindung. D'Haaptstrooss N 125, déi d'Algarve vun Osten no Westen duerchleeft, féiert direkt laanscht d'Stad. Och d'Autobunn A22 läit just e puer Kilometer am Hannerland. Bis op Faro sinn et ronn 30 km, bis bei d'spuenesch Grenz grad esou vill. Ausserdeem ass d'Stad un d'Schinnennetz ugebonnen a ka vu Faro aus mam Zuch erreecht ginn.
D'Gemenge (freguesia) vum Krees Tavira:
- Cabanas de Tavira
- Cachopo
- Conceição
- Luz
- Santa Catarina da Fonte do Bispo
- Santa Luzia
- Santa Maria (Tavira)
- Santiago (Tavira)
- Santo Estêvão
