Die krap met die goue knypers

vanuit Wikipedia, die vrye ensiklopedie.

Die krap met die goue knypers (Le Crabe aux Pinces d'Or) is een van 'n reeks van die welbekende strokiesverhale, geskryf en geïllustreer deur die Belgiese skrywer Hergé, oor die jong held Kuifie en sy wedervaringe. Hierdie boek is die eerste een in die reeks wat die leser aan Kuifie se jarelange vriend, Kaptein Haddock voorstel.

Die krap met die goue knypers is die negende boek in die Kuifie-reeks. Dit is die eerste keer gepubliseer in 1941, (in Frans). Die eerste Afrikaanse uitgawe verskyn in 2005.

Pretbederwerswaarskuwing: Die storielyn of storie se einde volg hieronder.

[wysig] Die storielyn

Uit die gemompel van 'n dronkie en die inligting op 'n afgeskeurde flentertjie papier – wat lyk of dit deel is van die etiket vanaf 'n ingelegde krapvleisblikke – bevind Kuifie hom op 'n skip genaamd Karaboudjan. Hier word hy gevange geneem deur 'n bende skurke. Hulle maak hul geld deur opium in die krapblikkies te versteek. Nadat hy uit sy toegesluite kajuit ontsnap het, ontmoet Kuifie vir Kaptein Haddock, 'n alkoholis wat heel deur die mis is oor wat sy bemanning eintlik aanvang. Hulle twee ontsnap saam in 'n roeiboot, en word deur 'n vliegtuig aangeval. Alhoewel hulle dit regkry om die vliegtuig te kaap, stort hulle daarmee neer in die Sahara-woestyn.

Hulle trek deur die woestyn en bereik eindelik 'n hawe in Marokko. Daar word die kaptein ontvoer. Kuifie bevry hom, maar hulle raak altwee beskonke van die wyndampe wat gelek het uit die wynbalies wat stukkend geskiet is in die geveg tussen hulle en die boewe. Kuifie ontdek 'n allerbelangrike leidraad – die halssnoer in die vorm van 'n krap met goue knypers – om die nek van die eienaar van die wynkelder, en besef dat dié man die leier van die dwelmsmokkelaars moet wees. Die res van die bende word gevang en is gou agter tralies.

[wysig] Notas

Ná sy werk aan Koning Ottokar se septer, het Hergé begin werk aan sy volgende verhaal, Die land van swart goud. Die verhaal het 'n mindere storielyn gehad: Kuifie het betrokke geraak in die konflik tussen die Jode, Arabiere en die Britse soldate in die Midde-ooste. Toe Nazi Duitsland België beset het, het hy werk aan die verhaal opgeskort en eerder die storie geskryf waaroor dié artikel handel, wat minder kontroversieel was. Kuifie-avonture gedurende die Tweede Wêreldoorlog raak onderwerpe soos wetenskaplike missies en skattejagte aan.