Zauberformel
Us der alemannische Wikipedia, der freie Dialäkt-Enzyklopedy
Under em Name Zauberformle häd vo 1959 bis 2003 i de Schwiiz es ungschribnigs Gsetz gulte für d Waal vo Bundesräät. Wärend s am Aafang (ab 1848) nume freisinnigi Bundesräät gee häd, sind 1891 de erschti und 1919 de zweiti Konservativi, 1929 der erscht BGB und 1943 de erschti Linggi gwält worde. 1953 isch de Max Wäber vo de SP zruggträtte und di Lingge sind id Opposition. D Zauberformle häd sich eso ergää, wil damals d Wääleraateil eso gsi sind. Ab 1959 isch de Bundesrat eso zämegsetzt gsi:
- 2 Freisinnigi (später FDP)
- 2 Konservativ-Chrischtlichsoziali (sit 1970 CVP)
- 2 Sozialdemokrate
- 1 BGB (sit 1971 SVP)
Im 2003i isch d Ruth Metzler (CVP) abgwält woorde. Das isch erscht s dritt Mal sit 1848, das en Bundesraat abgwält worden isch. Mer häd de Frau Metzler nüüd vorgworfe, ussert, dass d SVP mee Stimme gmacht häd bi de Nationalraatswaale (wien scho 1999) und de Christoph Blocher ums verwurgle ind Bundesraat häd wele. Obwool s nume ein Budnesraat pro Kanton söt gee, häd d SVP tüchtig lobiert - und gwune.
