Escultura

De Biquipedia

Se clama escultura a:

• L'Arte de modelar, entretallar u entretallar en bardo, cantal, fusta u atro material ye una d'as Artes Polidas en a cuala l'artista se espresa por meyo de bolumens y espazios. A escultura ye l'arte plastico, l'arte de modelar feguras y reproduzir oxetos de bulto. En er, se encluyiban d'antis más todas as artes alfareras, as d'entretalladura y zinzel chunto con as de fundizión y remoldato.

• L'obra feita por o escultor.

A escultura se dibide en dos grans brancas,Estatuaria y Escultura ornamental, seguntes que represente a forma umana y esprese as conzeuzions suprasensibles de l'ombre u s'ocupe en reproduzir artisticamén os demás sers d'a naturaleza, animals u bechetals. A primera leba con propiedá o nome d'escultura y tien un ideyal mesmo, desempeñando a segunda un paper secundario a lo serbir d'ausillar a la primera y a l'Arquiteutura.

A estatuaria á la suya begada repleca tres cheners :

• a 'estatua, que reproduze una fegura umana u animal solada y por entero, á lo menos o suyo parti más noble que ye la cabeza
• a colla que representa barias feguras umanas en eszena ye dizir con una aizión común
• o relieu, que presenta feguras en eszena u soladas pero nomás brullando sobre una superfizie.

[Editar] Conduta de proporzions

A conduta representa en escultura y en pintura lo que o modulo en arquiteutura y no ye atra cosa, en cheneral, que o conchunto d'as mesuras proporzionals que s'alufran en a fegura umana.

Os artistas griegos d'o sieglo d'oro (sieglo V a.C.) abioron ya a suya conduta atribuyiu prenzipalmén á lo escultor Policleto y anque dende allora ha ito abendo retificazions y bariazions en mans d'os antigos y mudenos artistas, quedó pro establito por o pintor Leonardo da Vinci a remates d'o sieglo XV acomodando-se á er a mayoría d'os pintors y escultors. A mesura alazetal d'a conduta florentina prenita de l'ombre bien establiu ye en a cabeza. Ista se considera en altaria como a güeitena parti de tot o cuerpo, estando a cara a sobre parti d'o mesmo y d'una altaria igual a la largaria d'a man. Estando l'ombre en piet y estendillando os brazos, determina un cuadrau perfeuto con as ringlas que baxan a plomo y pasan por as estrimeras d'as mans y as que orizontalmén se tienden sobre a cabeza y debaxo d'os piules. As diagonals d'iste cuadrau se tallan en a zaguer bertebra lumbar y fixan en o zentro de toda la fegura. Tirando una orizontal por dito punto zentral se dibide l'ombre en dos partis iguals y cada una d'istas en atras dos, por ringlas paralelas que trescruzan por a metá d'o peito y por as rodetas. A cabeza se dibide á la suya begada en cuatro partis iguals estando una d'eras a nariz.

[Editar] Prozedimientos

A Escultura y más encara as artes a era subordinadas, se sirben de bariaus prozedimientos t'a suya execuzión. Os escultors gosan aprestar a suya obra formando en modelo (modelando) con buro u cheso fin a fegura que ha de serbir-les como alazet y este modelo equibale ta ers a lo bozeto t'o pintor u o plan ta l'arquiteuto . Dimpués, l'artista quita de puntos a suya obra con ausillo d'una cuadricla fendo-la proporzional a o suya mena. A matiera sobre a cuala treballa o escultor gosa estar bardo, cantal, fusta, bronze, fierro, marfil, plata u oro.

O prozedimiento alazetal y clasico siguito por os escultors ye l'entretallau, serbiendo-se d'escobre y buril u zinzel seguntes os casos pos encluso l'atros prozedimientos de fundir y moldeyar desixen más u menos retoques de zinzel si l'obra ha de salir perfeuta. S'emplegan antimás o remoldato u budau, o zincelau, o repuxau, o embutiu, o grabau y o raxoso u troquelau.

• Entretallar pende en tirar particlas a lo mazacón ya esbastato dica lograr otener a fegura que se pretende.
• Moldeyar ye dar a una pasta la deseyada forma adibiendo u quitando micotas de pasta .
• Budar ye otener una forma en buedo u laso t'aplenar-la dimpués con fundizión u con una pasta cualsiquiera y lograr a positiba.
• Zinzelar ye retocar con zinzel as feguras otenitas por o budau y tamién formar baxo relieus con o zinzel en una lamina metalica.
• Repuxar ye produzir en una lamina de metal a fuerza de martiello sobre bel molde los relieus y os buedos amenistables ta consiguir a forma que se pretende.
• Grabar ye afundir u fixar por curte (por meyo de zinzel u buril) sobre material duro un debuxo cualsiquier.
• Estampar u troquelar ye imprentar denzima una lamina de metal u de pasta un sello u troquel con as feguras en buedo ta que istas resulten de relieu.
• Embutir ye aplicar sobre un molde duro una delgada chapa de metal poliu ta que a fuerza de trucos prena as suyas formas y dimpués, quitando a chapa y chuniendo os cantos d'era quede una estatua u arreparo artistico buedo pero con aparienzia maziza. Tamién se clama embutiu y encrustato lo resultau de ficar bellas piezas en as forau u ballos prauticatos en atras. Son bariedaz d'istas encrustazions mui emplegatas en artes decoratibas, a taracea que se fa con fusta u marfil embutiendo-ne en a superfizie de bel mueble de fusta y a ataujía u damasquinato que se prautica ficando laminas de metal poliu en os debuxos ubiertos en bronze, fierro u azero. Con istas formas decoratibas se relaziona o granulau y a filigrana. Ista se fa aplicando filos u baguetas de metal poliu denzima d'atro d'a mesma clase u inferior produziendo debuxo y aquer sembrando de chicotas perlas metalicas a superfizie d'a xoya u pieza parellán.