Элтан Джон

Зьвесткі зь Вікіпэдыі — вольнай энцыкляпэдыі.

Сэр Элтан Гёркулэс Джон (Sir Elton Hercules John KBE, сапр. Рэджынальд Кенэт Дўайт, Reginald Kenneth Dwight, нар. 25 сакавіка 1947 г. у мястэчку Пінэр, Мідлсэкс) - брытанскі сьпявак, кампазытар, піяніст, спачатку больш зьвязаны з рок'н'ролам, пазьней - адзін з заснавальнікаў софт-попу, цяпер адна з найбольшых музычных зорак сучаснасьці.

[рэдагаваць] Біяграфія

Зь сярэдзіны 1960-х гг. Элтан Джон працаваў у складзе гурту Bluesology. Ягоныя першыя сусьветна вядомыя песьні зьявіліся ў 1971 г. у яго другім альбоме (Elton John), сярод іх мэлядычная баляда Your Song.

У 1970-я годы Джон стаўся адным з найбольш пасьпяховых поп-сьпевакоў дзякуючы гітам Rocket Man, Crocodile Rock, Saturday Night's Alright (For Fighting), Goodbye Yellow Brick Road, Candle In The Wind (песьне, прысьвечанай Мэрэлін Манро) і іншым.

На сцэне шчарбаты, у акулярах, таўставасты сьпявак выступаў у гратэскных і экстравагантных касьцюмах, што стварыла яму імідж гэткага эпатажнага Enfant Terrible ад поп-музыкі.

У 1980-я гг. Элтан Джон быў вядомы песьнямі Nikita, Sad Songs і I'm Still Standing, адметнай рысай яго стылю сталіся прыгожыя соля-партыі на фартэпіяна, у другой палове дзесяцігодзьдзя, аднак, ён не мінуў пэўнае творчае крызы.

У 1997 г. Джон выпусьціў новую вэрсію Candle In The Wind, якую ён прысьвяціў загінулай Прынцэсе Даяне. З аб'ёмам продажаў у 32 мільёны асобнікаў Candle In The Wind '97 сталася самым пасьпяховым сынглам у гісторыі, усю выручку Элтан Джон ахвяраваў на добрачыннасьць.

Час ад часу яму даводзілася змагацца з залежнасьцю ад какаіну, буліміяй і фінансавымі цяжкасьцямі, выкліканымі разнузданым ладам жыцьця.

У 2004 г. выяшаў новы альбом - Peachtree Road, па стылі блізкі да творчасьці сьпевака 1970-х гадоў.

Элтан Джон мае пярэстую і багатую біяграфію. У 1980 годзе ён абвесьціў аб сваёй бісэксуальнасьці, у 1984 г. ажаніўся зь нямецкай гукатэхнічцы Рэнатэ Бляўэль, а ў 1988 г. зь ёй развёўся. Пазьней Джон заявіў аб сабе як аб гомасэксуалісьце.

У 2001 г. на цырымоніі ўручэньня Grammy Элтан Джон сьпеў дуэтам з рэпэрам Eminem'ам, які дагэтуль быў вядомы сваімі сэксысцкімі і гамафобнымі выказваньнямі.

Пасьля сьмерці ягонага сябра Раяна Ўайта Элтан Джон шмат грошай ахвяруе на барацьбу з СНІД, патрануе некалькі фондаў, асабіста здымаецца ў сацыяльнай рэкляме.

У 1994 г. ён атрымаў Оскар за Can you feel the love tonight, песьню да Дыснэеўскага мультфільму Кароль ільвоў. 24 лютага 1998 г. каралева Альжбета II пасьвяціла Элтана Джона ў рыцары, цяпер яго ймя афіцыйна гучыць як Сэр Элтан Джон, рыцар ордэну Брытанскае Імпэрыі.

У сьнежні 2005 г. Элтан Джон мае намер ажаніцца з сваім сябрам. Аднаполыя шлюбы ў Вялікай Брытаніі пакуль што не дазволеныя, але ў сьнежні мае выйсьці закон, які іх легалізавацьме.