Euskara batua
Wikipedia(e)tik
Euskara Batua da euskara guztien eredu amankomuna, 1968an Arantzazuko (Oñati) Batzarrean abiatutako prozesutik sortua. Euskalki guztiek dituzten elementu komunak hartu ditu Euskara Batuak, bai eta bakoitzaren hainbat hitz propio ere, puzzle moduko bat osatuz.
Prozesua, hala ere, ez dago guztiz itxita, eta xehetasun batzuk oraindik eztabaidagarriak dira. Euskaltzaindiko kideak diren Ibon Sarasolaren "Euskara batuaren ajeak" liburua (Alberdania, 1997) eta Koldo Zuazoren "Euskararen sendabelarrak" ere (Alberdania, 2000) honen harira datoz. Lehenengoak hainbat hitz eztabaidagarri birplanteatzen ditu, askotan nazioarteko ereduei jarraituz eta Ipar/Hego Euskal Herriaren erlazio berdintsuagoa aldarrikatuz. Bigarrenak euskara batua eta euskalkien arteko orekaz jorratzen du. Hauetaz gain, beste egile batzuk lanak argitaratu dituzte azken urteotan, prozesua bizirik dagoela erakutsiz.
