Cjargne

De Vichipedie, la enciclopedie libare dute in marilenghe.

La Cjargne e je une regjon storiche dal Friûl, tes Alps Orientâls; i siei confins a son lis Alps Cjargnelis a nord, il Tiliment a sud (fin ae confluence de Fele tal Tiliment), par une superficie totâl di 1220 km². Fuarts rapuarts storic a lein la Cjargne cu lis areis confinantis de Provincie di Belun e ancje cun il Friûl culinâr.

[cambie] Gjeografie

La Cjargne e je une regjon componude di siet valadis, ognidune cul sô torent:

Cjanâl di San Pieri, traviersât dal Bût

Cjanâl di Guart, traviersât dal Dean

Cjanâl di Lumiei, traviersât dal Lumiei

Cjanâl di Peteç, traviersât dal Tiliment

Cjanâl Pedarç, traviersât da la Pesarine

Cjanâl d'Incjaroi, traviersât dal Cjarsò

Cjanâl di Monai, traviersât da la Valcjalde

Chescj flums a si butin ducj tal Tiliment, atôr di Tumieç, che al è il centri principâl e pi grant de Cjargne. A nord la Cjargne e confine cun l'Austrie, a ovest cu lis Prealps venitis, a est cul Cjanâl d'Aupe. Dal pont di viste gjeologjic a si cjatin diviers gjenars di piere intai monts: il calcâr, la dolomie e la silice. I monts pi alts a son il Colians (2780 m) e la Peralbe (2694 m). Impuartants a son ancje la Mariane (1906 m),che al è il mont di Tumieç, il Serenât (2187 m), la Crete Forade (2462 m), il Siere (2443 m), il Clap Grant (2487), la Bivare (2474 m).

[cambie] Popolazion

Al dì di vuê la Cjargne e à cirche 40.000 abitants, cun plui di 10.000 dome a Tumieç. La densitât e je une vore basse, e al probleme dal abandon dai paîs al è fuart; dopo dal 1866, cu la Unificazion de Italie, un grum di int lassà la sô tiere par emigrâ in Europe, Americhe o Australie, cirint un futûr mancul puar e cence dutis lis dificoltâts de vite in montagne. Ancjemò vuê a son pocjis lis industriis, ancje se chest al à judât la conservazion dal ambient.