Península do Barbanza
Na Galipedia, a wikipedia en galego.
Polo nome de Barbanza podemos entender dúas cousas: a comarca do Barbanza e a península. Mentres a comarca só engloba a parte sur desta península, a península engloba, ademáis, gran parte da comarca de Noia: os concellos de Porto do Son, Lousame e Noia. Polo tanto, a península engloba, en total, os concellos anteriormente citados e os de Ribeira, A Pobra do Caramiñal, Boiro e Rianxo.
A península está bañada, polo nordés, pola ría de Muros e Noia, e polo surleste, pola ría de Arousa. O punto máis occidental da península é o cabo Corrubedo e o máis meridional, a punta Perico, ambos no concello de Ribeira. Os puntos máis septentrionais e orientais non lindan co mar senón con outros concellos coruñenes.
O punto máis alto da península é Iroite, monte de 650 metros no norte do concello de Porto do Son. Mais supéralle en fama, quizáis, a Curota, de 514 metros de altura, e dende o cal temos a impresionante vista de toda a ría de Arousa.
A extensión dos concellos da península é, aproximadamente, de 468 km², nos que se concentra unha poboación moi elevada: 94931. Isto da unha moi alta densidade de poboación: 202'8 hab/km².
Esta alta densidade de poboación, sen embargo, parece non afectar demasiado á fauna e flora do lugar, pois mesmo no concello de Ribeira, o máis poboado da penísula, atópase o parque natural das dunas de Corrubedo; así como hai outras moitas zonas relativamente virxes, especialmente no concello de Porto do Son e Lousame, onde hai zonas con moi baixas densidades de poboación.
A península do Barbanza é un lugar onde se poden atopar moitos ríos, algúns bastante caudalosos, coma o río Sieira ou o río Barbanza. Pero, indudablemente, o maior río que pasa polo Barbanza, é tamén un dos maiores de Galicia, é o Tambre, que pasa polo concello de Lousame e desemboca no de Noia.
No apartado económico, pódese salientar a grande industrialización de Santa Uxía, capital de Ribeira, ou a vila de Noia, onde se atopa unha grande cantidade de comercios. Son importantes tamén núcleos urbáns que non son capital de concello, onde son importantes, por exemplo, os que rodean Santa Uxía (Palmeira, Aguiño...) ou Portosín, no concello de Porto do Son.
