Chrëschtlech Theologie

Vu Wikipedia, der fräier Enzyklopedie.

D'Theologie ewéi se vun de chrëschtleche Kierche geléiert gëtt versteht sech nom ëmmer nach aktuellen an villzitéierten Saatz vum Anselm vun Canterbury (1033-1109) als fides quaerens intellectum (Glawen den no Verstoen sicht), d.h. si versicht op eng systematesch-wëssenschaftlech Art a Weis de Glawen ze hannerfroen, ze ënnesichen an ze formuléieren. Si ëmfaasst folgend Deelwëssenschaften:

[Änneren] Positiv Disziplinnen

D'Exeges (Bibelwëssenschaft) ënnersicht wéi déi verschidden Texter aus der Bibel zustanekoumen.
D'Kierchegeschicht retracéiert d'Geschicht vun der Kierch vun hiren Ufäng bis haut.
D'Kiercherecht beschäftegt sech mat der Gesetzgebung vun der Kierch a Relatioun mat der Gesellschaft an de Staaten.

[Änneren] Praktesch Disziplinnen

D'Pastoraltheologie behandelt d'Bezéiungen, d'Handlungen etc. an enger Gemeinschaft vu Gleewegen.
D'Reliounspädagogik erschaaft a verbreet Methode fir d'Glawensinhalter ze enséignéieren.
D'Missiologie ënnersicht d'Méiglechkeete fir de chrëschtleche Glawen a Géigende mat enger anerer Relioun ze verbreeden.

[Änneren] Reflexiv Disziplinnen

D'Moraltheologie an d'Ethik beschäftege sech mat de Froe vum mënschlechen Handelen aus der Perspektiv vum Glawen.
D'systematesch Theologie ass spekulativ, si ënnerdeelt sech:
- D'Dogmatik systematiséiert d'Glawensinhalter, hält se kohärent a weist hiren Intérêt fir d'Mënschen aus der heiteger Zäit op. Wëll d'Glawensinhalter e risegen Themenblock duerstellen ginn et nach eng ganz Rei vun Ennerfächer bannent der Dogmatik (mat de Froen op déi se wëllen eng Äntwert ginn):
  - Christologie: Wien war de Jesus als Mensch an als Sohn Gottes?
  - Soteriologie: Wéi gesäit den Heilsplang vu Gott aus?
  - Pneumatologie: Wien ass den Hellege Geescht?
  - Theologie (sens strict): Wien ass Gott de Papp an wat sinn d'Relatiounen tëscht de Persounen vun der Dräifaltegkeet?
  - Ekklesiologie: wat ass d'Kierch a wat sinn hir Funktiounen?
  - Eschatologie: wat erwaard eis um Schluss, um perséinlechen Liewesenn an kollektiv um Enn vun der Zäit?
- D'Fundamentaltheologie behandelt d'Grondlage vun der Theologie (Virausetzunge vum Glawen, praeambula fidei) souwéi d'Relatioun vun dëser mat anere Wëssenschaften wéi z.B. der Philosophie oder der Sproochwëssenschaft.