Nederlands
Van Wikipedia
- Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.
| Nederlands | ||
|---|---|---|
| Inheimse name: | Nederlands | |
| gekald in: | Nederland, Vlaondere | |
| classificatie: | Indo-Europees Germaans Wesgermaans Nederduits Nederfrankisch Wesnederfrankisch (Hollands en Braobants) Nederlands |
|
| aantal sjpraekers: | 20 miljoen (totaol) | |
| conservatiegraod: | neet bedreig | |
| officieel taal: | in Nederland, 't Belsj, Suriname, Nederlandse Antille, Aruba |
|
| ISO-639-codes: | nl, nld (dut), nld | |
't Nederlands is de meis gesproke en officieel taol vaan Nederland en 't gewes Vlaandere. Wijer is 't ouch de officieel taol vaan de Nederlandse Antille, Aruba en Suriname. De dialekte die oonder Nederlands ingedeild weure zien genetisch Wesnederfrankisch; 't Limburgs is daan Oosnederfankisch/ Zuidoosnederfrankisch. E klein deil vaan Duitsland, 't Neder-Rienland (bij Nijmege euver de grens), heet dialekte die ouch Wesnederfrankisch vaan karakter zien, wie vaanajds 't oeterste noorde vaan Fraankriek (Frans Vlaandere). Zoe good wie alle Limburgers liere leze en sjrieve in de Nederlandse Standerdtaol. 't Nederlands is veur de meiste Limburgse dialekte ouch de meis verwante taol. Oongeveer twinteg miljoen minse in de gaanse wereld spreke Nederlands, daoneve oongeveer vief miljoen es twiede taol (boeoonder de Limburgers).
[bewirk] Dialekte
Meistens weurt in Limburg mèt de tèrm Hollands nao de gaanse Nederlandse taol verweze. In taolkundeg verband is dat evels stèrk aof te raoje, umtot 't Hollands eigelik inkel ein groop dialekte vaan 't Nederlands is. 't Is in groete lijne wel dee variant boe-op de Nederlandse Standertaol gebaseerd is. Rouwweeg kin me drei houfgrope oondersjeie, namelik 't Hollands, 't Braobants-Oosvlaoms en 't Ziews-Wesvlaoms. 't Ziews en 't Wesvlaoms weure soms es 'n aparte taol of zelfs twie aparte taole besjouwd, umtot ze neet geaffecteerd zien door de Braobantse diftongering. De Braobantse en de Hollandse dialekte, die de groetste bijdraog gedoon höbbe aon de standertaol, koume bij de meiste oonderzeukers neet veur 'n aparte status in aonmeerking.
't Hollands oondersjeit ziech vaan de aander dialekte door 't gebroek vaan jij veur "doe" en 't vörme vaan diminutieve op -ie. 't Braobants heet gij en vörmp diminutieve wie 't Limburgs. De Ziewse groop kinmerk ziech door 't behawwe vaan de ii en uu boe de meiste aander dialekte ei/ai en ew/oi höbbe ('t Limburgs, mèt in de meiste dialekte ii en oe, is nog conservatiever). De Braobantse groop is veur Limburg 't interessants, umtot zie 't èngs mèt 't Limburgs verwant is en väöl dialekte in Noord-Limburg daotouw behure.
