Emden
From Wikipedia
Emden is Stadt sünner en Landkreis un liggt daar, war de Eems in de Dullert mündt. Mit so wat van 50.000 Inwahners is se de gröttste Stadt in Oostfreesland. In'd Nörden un Oosten stött se an de Landkreis Auerk (Gemeenten Krummhörn, Hint, Südbrookmerland un Ihl), in' Südoosten an de Landkreis Leer (Gemeente Moormerland).
De Stadt Emden is in de Stadtdeelen Wybelsum, Logumer Vörwark, Twixlum, Larrelt, Larrelt/VW-Siedlung, PortArthur/Transvaal, Conrebbersweg, Früchteburg, Harsweg, Barenburg, Stadtzentrum, Wolthusen/Neubaugebiet, Wolthusen/Dorf, Uphusen/Marienwehr, Herrentor, Freesland, Borßum/Hilmarsum, Widdelswehr/Jarßum, Petjem un Constantia updeelt.
Fröher harr Emden mennig Lü upnohmen, de ut de Nedderlannen kwammen. Se harren daar Arger kregen, umdat se neet van hör protestantisk-calvinistisk Glöven offlaten wullen. So kummt dat, dat de meeste Lü in Emden vandag to de reformeerte Kark hören. Man dat gift ok lutherske un anner Karken in Emden.
In de tweet Weltorlog is en grote Deel van Emden kött maakt worden, umdat de Stadt en wichtige Haven harr.
Ok vandag is Emden en Havenstadt. Man wat besünners för de Emder un oostfreeske Wertskupp is dat VW-Wark in Emden-Larrelt. Daar hebben mennig Oostfresen hör Arbeidssteden. In Emden gift dat ok en Deel van de Fackhoogschool Ollnborg/Oostfreesland/Wilhelmshaven (FH-OOW). De Präsidentske van de Hoogschool sitt in Emden.
