Theoderich II.
From Wikipedia
Theoderich II. († 466) weer een vun de jüngern Söhns vun den westgootschen König Theoderich I..
In dat Jahr 453 folg he sienen öllern Broder Thorismund as König vun de Westgoten up. He harr em, tohopen mit Frederik, eenen annern vun siene Bröder, an de Siet bröcht. He regeer de Westgoten ehr Riek vun Tolosa (hüdigendags Toulouse) in dat hüdige Aquitanien un heel sik dune bi dat weströömsche Riek. Tohopen mit weströömsche Truppen güng he ok gegen de upsternaatschen Bagauden gegenan.
Theoderich II. hett woll bi den Römer Avitus Latienünnerricht kregen. In dat Jahr 455 hett he Avitus hulpen, sik de weströömsche Kaiserkroon uptosetten. In den Updrag vun düssen Kaiser güng he denn gegen de Sueben up de iberisch Halfinsel gegenan. As Avitus afsett un ümbröcht wurrn weer, versöch he, soveel weströömsche Kuntreien, as man möglich weer, för dat Riek vun de Westgoten intonehmen. He versöch dorbi, de Stadt Arles to besetten un leeg mit sien Armee dor ümto. Arles weer de Setel vun den röömschen Präfekt vun Gallien. Man de nee Kaiser Maiorian stüür dor sien Heerföhrer Aegidius hen un de möök en Enn mit düssen Versöök. Dornah hett de Kaiser den olen Verdrag mit de Westgoten wedder nee maakt. Man Maiorian is vun sien eegen Heerföhrer Ricimer an de Siet bröcht wurrn. Ricimer hett sik denn to’n Kaiser upswungen. Man Aegidius füng in dat Jahr 461 enen Upstand gegen em an un Ricimer fraag bi de Westgoten an, of de em nich hölpen kunnen. Theoderich II. kreeg för düsse Help de Stadt Narbonne un trock gegen Aegidius in den Krieg. Man Aegidius harr sik mit de Salfranken ünner jem ehren König Childerich I. tosamenslaten. Dor keem dat 463 bi dat hüdige Orléans to ene grote Slacht. De Westgoten hefft verlaren, Frederik wurr dootmaakt.
As Aegidius 464 oder 465 sturv, konnen de Westgoten jem ehr Riek bit nah de Loire utbreden. Mit de Sueben wurr Freden slaten un en westgootschen Missionar hett jem to de ariaansche Aart vun dat Christendom bekehrt.
In dat Jahr 466 is Theoderich II. vun sienen Broder Eurich an de Siet bröcht wurrn. Eurich is den König vun de Westgoten wurrn.
Kiek ok nah bi de List vun de Westgoten ehr Königen.
