Raimon-Rogièr Trencavel

Un article de Wikipèdia, l'enciclopèdia liura.

Raimon-Rogièr Trencavel (1185 - 10 de novembre 1209) es un membre de l'Ostal Trencavel. Èra vescomte d'Albi e de Besièrs (infeodat al comte de Tolosa), e vescomte de Carcassona e de Razès (infeodat al comte de Barcelona qu’èra dins lo meteis temps rei d'Aragon). Foguèt un dels eròis e en meteis temps una de las primièras victimas de la crosada dels Albigeses.

[Modificar] Familha

Raimon-Rogièr es lo filh de Rogièr II Trencavel e lo nebòt de Raimon VI de Tolosa. Esposèt Agnès de Montpelhièr. De lor union nasquèt un filh : Raimon II Trencavel.

[Modificar] Començament del renhe

Raimon-Rogièr viviá al castèl comtal de Carcassona qu'èra estat construch per sos ancèstres al sègle XI. Mentre qu'èra pas catar, Raimon-Rogièr aviá adoptat l'actitud permissiva e liberala dels sénhers del Lengadòc en matièra de religion. En efièch, comptava sus la comunautat josieva per administrar Besièrs, son segond fièu per òrdre d'importància.

[Modificar] La crosada dels Albigeses

En seguida a l'assassinat de son legat Pèire de Castelnòu en 1208, lo papa Innocent III desenclava la crosada contra los albigeses. Fa prononciar de senténcias d'escomenge envèrs los sénhers del Lengadòc (aquò concernís, entre autre, Raimon-Rogièr e son oncle Raimon VI de Tolosa) jutjats tròp permissius envèrs los erètges e balha lor tèrra en preda.

A la mièg-1209, los crosats s'acampan a Lion e començan a caminar vèrs lo Sud. En junn, Raimon de Tolosa, vesent lo dangièr se raprochar, fa act de contriccion e promèt de luchar contra l'eresia. Son escomenge es levat e sas tèrras venon alara protegidas dels crosats.

Aquestes darrièrs se tornan alara vèrs Montpelhièr e las tèrras de Raimon-Rogièr. Aqueste darrièr tempta de seguir los passes de son oncle mas los legats del papa refusan de lo daissar los rencontrar pendent que los crosats caminan sus Besièrs dont faguèron lo sac en julhet. Aquò butèt Raimon-Rogièr a se replegar sus Carcassona.

Lo 1 d'agost, los crosats començan lo sèti de la ciutat. En temps que vassal del rei d'Aragon, Raimon-Rogièr pensava que Pèire II vendriá lo secórrer, mas aqueste darrièr, vassal dirècte del papa preferiguèt la via diplomatica e joguèt lo mediator. Las negociacions capitèron pas e lo rei repartiguèt. L'aiga vinguèt a mencar dins la ciutat, çò que provoquèt sa redicion vèrs lo 15 d'agost.

Raimon-Rogièr prenguèt en carga las negociacions. Çò que s'i passèt es somés a d'especulacions. Foguèt arrestat pendent los perparlars o se constituèt otatge en escambi de la vida dels abitants de la ciutat? Çò segur es que se retrobèt emprisonat dins una de sas pròprias bassas-fòssas e los abitants de Carcassona foguèron caçats de la vila sens poder prendre de qué assegurar lor per viure.

Qualques meses mai tard, Raimon-Rogièr moriguèt al fons de son croton, versemblablament d'una dissentariá, causa que s'adobèt plan per Simon de Montfòrt que poguèt prendre possession dels territòris Trencavel.