Cummattimentu d'az-Zallaqah
From Wikipedia
Lu cummattimentu d'az-Zallaqah (23 di uttùviru 1086), passata â Storia di l'Europa cristiana comu lu Cummattimentu di Sagrajas, fu nu scontru chi abbinìu ntô cuntestu cchiù largu dâ Ricunquista spagnola tra li surdati dû cummannanti almuravidi Yusuf ibn Tashfin e lu re Alfonsu VI di Castigghia, e cummattutu ô nord dâ banna di l'Estremadura.
L'armata di Yusuf ibn Tashfin cuntava 30.000 surdati. Alfonsu VI di Castigghia arrivau supra lu campu di battagghia cu 60.000 guirreri. Li dui ginirali trattaru prima dû cummattimentu e Yusuf ibn Tashfin uffrìu ô sò nimicu tri scelti: cummirtìrisi a l'Islam, pagari un tribbutu o cummàttiri. Alfonsu prifirìu cummàttiri.
Lu cummattimentu accuminzau a l'arba di venniridìa c'un attaccu di Alfonsu. Yusuf spartìu li soi forzi pi tri gruppi. Lu primu cuntava 15.000 òmini ô cummannu di Abbad III al-Mu'tamid, lu secunnu cumprinnìu 11.000 guirreri capitanati di Yusuf stissu e lu terzu cunsistìu di 4.000 guirreri africani armati chî spati inniani e lanzi longhi. Abbad III al-Mu'tamid e lu sò gruppu cummatteru di suli Alfonsu nzinu a menziornu quannu Yusuf e lu sò gruppu circunnaru Alfonsu e li soi truppi. Lu scantu si diffunìu tra l'òmini di Alfonsu chi accuminzaru a ritiràrisi e a ddu puntu Yusuf fici attaccari puru lu terzu gruppu, p'accabbari lu cummattimentu. Li pèrditi d'Alfonsu foru assai pisanti (cchiossai di 59.500 morti): sulu 100 cavaleri rinisceru a turnari 'n Castigghia. Alfonsu supravvivìu ma pirdìu na jamma.
Lu tirrenu dû cummattimentu vinni chiamatu az-Zallaqah (tirrenu sciddicusu) pirchì li guirreri sciddicaru di cuntìnuu a causa dâ ncridìbbili quantitati di sangu chi mpannava lu tirrenu.
