جہاد
وکیپیڈیا سے
خدا کی راہ میں جانی و مالی قربانی سے دریغ نہ کرنا ۔ قیام امن اور مظلوم کو ظالم کے ظلم سے نجات دلانے کے لیے تلوار اٹھانا۔ یا اس مقصد کے حصول کے لیے جنگ کے کسی متعلقہ شعبے میں خلوص نیت سے خدمات انجام دینا جہاد کہلاتا ہے۔ قرآن مجیدمیں جہاد پر خاص طور پر زور دیا گیا ہے۔ یہی وجہ ہے کہ یہ اسلام کے بنیادی متعقدات میں سے سمجھا جاتا ہے۔ اور اس کو اسلام کا چھٹا رکن بھی کہتے ہیں۔ قرآن میں ہے:
ترجمہ: خدا کی راہ میں اس طرح جہادکرو جیسا کہ جہاد کرنے کا حق ہے۔
قرآن میں جہاد کے متعلق جو آیات ہین وہ مدنی ہیں اور یہیں آکر مسلمانوں کو کفار کے مقابلے میں تلوار اٹھانے کا حکم ہوا۔ اس سلسلے میں سب سے پہلے قریش اور مسلمانوں میں بدر کے مقام پر لڑائی ہوئی جس میں مسلمانوں کو فتح نصیب ہوئی۔ رسول اللہ صلی اللہ علیہ وسلم کی وفات کے بعد اسلامی فوجیں دوسرے ملکوں میں پھیل گئیں۔ مسلمان جس ملک میں جاتے وہاں کے لوگوں کے سامنے تین مطالبات پیش کرتے
1۔ مسلمان ہوجاؤ تو تم ہمارے بھائی بن جاؤ گے اور ہمارے اور تمہارے درمیان کوئی امتیاز نہیں رہے گا۔
2۔ جزیہ اور خراج دینا قبول کرو۔
3۔ اگر وہ دونوں باتوں میں سے کوئی بات منظور نہیں تو میدان جنگ میں آؤ۔
جہاد میں شرکت کو مسلمان بہت بڑی عزت خیال کرتے ہیں اور خدا کی راہ میں جو مسلمان اپنی جان دے وہ شہید کہلاتا ہے۔
جہاد کی اور بھی کئی قسمیں ہیں۔ ایک حدیث کے مطابق جابر سلطان کے سامنے کلمۂ حق کہنا بہت بڑا جہاد ہے۔ اسی طرح اپنے نفس کے ستھ جہاد کرنے کو جہاد اکبر کہا گیا ہے۔ اس کے علاوہ ہاتھ ، زبان ، قلم سے بھی جہاد ہو سکتا ہے۔ جہاد کے متعلق حکم یہ ہے کہ جب خلیفہ یا امام جہاد کے لیے پکارے تو کسی مسلمان کے لیے جائز نہیں کہ کسی عذر کے بغیر اس سے پہلوتہی کرے۔
