Scientologie
vanuit Wikipedia, die vrye ensiklopedie.
Scientologie is 'n soort filosofies-religieuse beweging wat beweer dat hy die geestelike en fisiese gesondheid van sy aanhangers heelwat kan verbeter. Die kern van hul leerstellinge is dat 'n mens, deur deelname in Scientologie, as geestelike wese bevry kan word van die ligaam en die aardsgebonde lewe en daarna in staat sal wees om 'n helende invloed te bewerk oor sy lewe en die lewens van andere. Die Scientologiese Kerk (Church of Scientology) is gestig deur die Amerikaanse skrywer van wetenskapsfiksie L. Ron Hubbard (13 Maart 1911 - 24 Januarie 1986). Een van sy bekendste boeke is Dianetiek - die moderne wetenskap van geestelike gesondheid.
Al in die vyftigerjare strek L. Ron Hubbard se werksaamhede ook na Suid-Afrika, waar hy 'n tyd lank by die Johannesburgse Scientology-organisasie besig is. Later koop hy 'n villa in Salisbury (destyds Rhodesië) waar hy tydens sy partytjies met die welgesteldes van die land, insluitende die Eerste Minister Ian Smith, verkeer. Nadat sy toeristevisum nie verleng is nie, verlaat hy Rhodesië in die volgende jaar.
Die Suid-Afrikaanse regering stel in 1969 'n ondersoek oor die Scientologie-beweging in. As gevolg hievan besluit die regering om geen verdere stappe teen die beweging in te stel nie.
In 1982 skeur die beweging in twee nadat die stigter L Ron Hubbard hom van direkte betrokkenheid met die organisasie ontrek het. Tans bestaan daar die 'amptelike' Church of Scientology International wat die voortsetting van die oorspronlike kerk is, en die sogenaamde 'Freezone' wat hom daarop instel om suiwer Scientologie te verkondig sonder die las van buitensporige geld eise en aantygings van kultus en breinspoeling.
Hoewel enkele state soos die VSA, Nederland en Swede die kerk nou amptelik erken bly die beweging steeds omstrede omdat hy geld ("vasgestelde skenkings") vir sy kursusse vra en - soos deur sommige kritici word beweer - gebruik maak van breinspoeling. Feit is dat die kerk probeer uitbrei en 'n besonderlike terminologie ontwikkel het. Dit is blykbaar 'n moderne soort religieuse beweging wat strominge uit die psigologie, psigoanalise, oosterse religies en wetenskapsfiksie oorgeneem het. Lede is sterk betrokke by die bestryding van dwelmsug, wantoestande in psigiatriese instellings en op baie ander gebiede.
