Kanton Basel-Stadt

Us der alemannische Wikipedia, der freie Dialäkt-Enzyklopedy

Kanton Basel-Stadt


Basisdate
Hauptort:	Basel
Flächi:	37 km² (Rang 26)
Iwohner:	186'700 (2004) (Rang 14)
Bevölkerigsdichti:	5'046 Iw./km² (Rang )
Bitritt zue dr Eidgnosseschaft:	1501
Abchürzig:	BS
Sproche:	Deutsch
Websyte:	Kanton Basel-Stadt
Karte

Dr Kanton Basel-Stadt isch e Halbkanton in dr Nordwestschwiiz.

[ändere] Geographie

Vo dr Flächi här, isches dr kleinsti Kanton (37km²) und gränzt diräkt an Düütschland und Frankriich. Är bestoht us de drei Gemeinde Basel, Rieche und Bettige. Die drei Gemeinde wärde nid in Bezirk ufteilt, will si alli nur ei Stadt umfasse, usser Bettige, wo in zwei Ortschafte ufteilt wird: Bettige Dorf und St. Chrischona. S Fischerdorf Kleihünige wird zur Stadt Basel derzue zählt.

Basel-Stadt wird vom Rhyy durchflosse. Usserdäm befindet sichs Rhyyknüü in dr Stadt Basel, wo d Birsig in Rhyy fliesst und dr Rhyy e knick macht.

[ändere] Politik

S Parlament in Basel nennt sich "Grosse Root", het e vierjöhrigi Amtsperiode und het 130 Mitglieder. D Exekutive nennt sich Regierigsroot und die Judikativi bildet s Appelationsgricht wo im frei gwählte Statthalter unterstoht.

Bsunderheite sin im Kanton Basel-Stadt die linksgrichtete Wahle. Langi Zit het me vom rote Basel gredet, will in Basel dr höchsti Aateil vo linke wähler sin. Im Joor 2000 isch Basel s erste mol ufe gsamtschwizerische Durchschnitt vo linke wähler gsunke. In de nexte joore ischr aber widr gstiige. Basel-Stadt isch usserdäm eine vo de wenige Kantön, wo "Jo" gstumme het bi de Abstimmige übr die erliichtereti Iibürgerig vo Usländer in dr zweite Generation und übr die automatischi Iibürgerig vo Usländer in dr dritte Generation.

Am stärkste isch d Partei SP. Die Grüene und die Alternative hän e Bündnis in Basel und nenne sich BastA! was für "Basels starke Alternative" stoht.

In dr Stadt Rieche sin die rächte e Bitz stärker als in dr Stadt Basel. Das lost sich evtl. drmit erkläre, dass d Basler SVP Parteipresidäntin Angelika Zanolari vo dört isch. D Angelika Zanolari isch bekannt für ihri umstrittene Üsserige wie z.B. "Einen Taliban als Regierungsrat?", wo si gseit het, wo s ums Usländerstimmrecht gange isch. Uffällig an der SVP isch usserdäm, dass fast alli ihri Initiative e Zesatz wie z.B. "Unserer Schweiz zuliebe" oder "Unseren Kindern zuliebe" enthalte.

Die rächtisti Partei in Basel ischd SD - Schweizer Demokraten. Si het nur ei Sitz im Grosse Root und dä wird vom Markus Borner belegt. Ihri Ziel sin dr Alpeschutz, d Erhaltig vo dr Schwiizer Kultur und d verhinderig vo dr "Überfremdig". Meistens mache si bi Grossrootswahle e Listeverbindig mit der VA («Volksaktion gegen zu viele Ausländer»). S zuviele in däm Satz isch immer unterstriche. Villicht will si Angst hän dass ihne s gliiche passiert wie ere ähnliche Partei in Dütschland namens AAR (Aktion Ausländerrückführung - Volksbewegung gegen Überfremdung und Umweltzerstörung ), nämlig dass si wäge Rassismus verbote wärde.

[ändere] Verkehr

Basel-Stadt het e sehr gueti Infrastruktur.

D BVB (Basler Verkehrsbetriebe) durchzieht mit 8 Tram-Linie und 12 Buslinie dr ganzi Kanton. Usserdäm fahre au d Tramlinie 10, 11 und 17 und d Buslinie 37 vo dr BLT (Basel-Land Transport) durch d Stadt Basel.

In Basel hets drei Internationali Bahnhöf. Basel SBB, Basel SNCF (dr französischi Teil vom Basel SBB) und dr Badisch Bahnhof und drei Lokalbahnhöf (St. Jakob, St. Johann, Riehen).

D Rhyyschifffahrt isch für d Stadt Basel früener sehr wichtig gsi, verliert jetzt aber langsam an Bedütig.

Basel-Stadt het au e Flughafe. Är ligt eigentlich uf französischem Terrain, isch aber e Trinationale Flughafe und heisst Flughafen Basel Mulhouse Freiburg, wird aber au EuroAirport gnennt.

[ändere] Gschicht

Dr Kanton Basel-Stadt het sich im Joor 1833 vom Kanton Basel-Landschaft abgspaltet. S Problem mit däm isch dass jetzt viili Lüt us andere Kantön in Basel ins Spital usw. gön, aber nid dört läbe, das macht im Kanton starki finanzielli Schwierigkeite.