Tomás d'Aquino
De Uiquipedia
Santu Tomás d'Aquino (1225 - 7 de marzu de 1274), monxu dominicu d'orixe napolitanu. Fíu de los condes d'Aquino, estudió na Universidá de Nápoles. Posteriormente foi docente na Universidá de París ente 1256 y 1259 y ente 1269 y 1272.
Treslladóse definitivamene a Nápoles y morrió nel añu 1274 durante un viaxe a Lyon, au diba formar parte nun Conciliu convocáu pol Papa. Ente los sos escritos filosóficos destaquen dellos comentarios a les obres d'Aristóteles, asina como los opúsculos L'ente y la esencia (De ente et essentia) y Sobre la unidá del entendimientu (De unitate intellectus) escontra los averroistes. No que cinca a la so producción teolóxica, destaquen obres de gran altor filosóficu como Summa Theologiae y Summa contra gentiles.
[editar] Pensamientu filosóficu
La filosofía tomista caracterízase por armonizar los dogmes de la relixón cristiana coles principales tesis filosófiques d'Aristóteles, nuna época na qu'esti últimu yera vistu como'l principal enemigu intelectual del cristianismu. Perdíes dende los primeros sieglos del Imperiu Romanu, les obres aristotéliques foron redescubiertes nel sieglu XII. Nesti sen, son especialmente relevantes los intentos de Tomás d'Aquino d'oponese a los comentarios sobre Aristóteles fechos polos filósofos árabes d'orixe español Averroes (1126-1198), desplicando tesis dafechu opuestes a la Revelación cristiana.
La metafísica tomista destaca por introducir el distingu ente esencia y existencia, base conceptual sobre la que llexitimar una xerarquización de los entes existentes, dende la primacía de Dios, ente supremu y trescendente, hasta los seres inanimaos, pasando polos ánxeles, los humanos y el restu de seres vivos. La separación fundamental entre Dios y el restu de los entes estriba en que'l primeru tien la existencia como propiedá constitutiva de la esencia divina, mientres que'l restu recibe, en diversos grados, la existencia de Dios al traviés d'un actu creador.
Dende'l puntu de vista de la Teoloxía filosófica tamién son destacables les cinco prebes tomistas de la existencia de Dios, nes que pretende demostrar racionalmente la so existencia partiendo de fechos observables por cualquier ser humanu. Conocense col nome de prebes a posteriori pa estremales de les prebes meramente racionales propuestes anteriormente nel S. XI pol monxu Anselmo de Canterbury.
N'ética y política desendolcó la distinción ente llei natural y llei positiva, siendo la primera la base obxetiva na qu'afitar tou códigu moral humanu concretu (elimínase d'esta mena'l relativismu moral) y toa llei civil positiva. En casu conflictu ente l'autoridá civil y la de la Ilesia, Tomás propón caltener el criteriu d'esta última, pues ocúpase del bien del alma, superior, según él, al bien corporal (asuntu del poder civil).
