Novella Cantarutti
De Vichipedie, la enciclopedie libare dute in marilenghe.
Novella Cantarutti (Spilimberc, ai 26 di Avost dal 1920) e je une des plui impuartantis poetessis furlanis dal Nûfcent.
[cambie] La vite
Nassude a Spilimberc, e passà la sô infanzie a Navarons di Midun, paîs di dulà che vignive sô mari, e lis sôs composizions doprin simpri il furlan di chest paîs; il pari al jere stât l'ultin sindic socialist di Spilimberc prime de vignude dal Fassisim tal 1922. Novella e studià a Udin, tal “Collegio delle Zitelle”, dulà che cjatà insegnants impuartants come par esempli Josef Marchet pal latin. Po si iscrivè ae Universitât Catoliche di Milan, ancje se dopo doi agns e scugnì bandonâ par vie dai bombardaments, e tornà cussì a cjase; tornade a cjapâ su i studiis ae fin de vuere mondiâl, si lauree tal 1952 a Rome in Letaris.Za in chest periodi jê e veve scomençât a colaborâ e a scrivi su cualchi riviste (par esempli sul Ce fâstu? tal 1942); tal 1945 Pieri Pauli Pasolini la invidà a fâ part de Academiuta da lenga furlana, e Novella Cantarutti acete, pûr cence mai sintîsi part di un socie o di un sodalizi, par no scugnî adatâ lis sôs ideis a chês dai altris. Jê e devente ancje amie di Pasolini, cul cuâl e reste in rapuarts fin ae so muart, tal 1975. Tal 1953 e scomence la cariere tal insegnament, prime inte scuele medie di Spilimberc, po dal 1957 al Istitût tecnic Malignani di Udin, dulà che restà par 25 agns. Vuê e vîf a Udin.
[cambie] Oparis
Novella Cantarutti e je famose sei pai siei lavôrs in prose e in poesie, componûts fin dai agns de Academiuta e pôc dopo, dilunc la esperience di Risultive, sei pes sôs ricercjis su lis tradizions furlanis, metint dongje racueltis di proverbis, contis, preieris; il sô scandai e fo fat sei tai lûcs natîfs, di là da l'aghe, sei in Cjargne, a Dieç, sei intes zonis venetofonis dal Friûl ocidentâl.
