Gebruiker:Thiois

vanuit Wikipedia, die vrye ensiklopedie.

Hallo almal,

My naam is Thiois alias Marcel Bas.

Ek is gebore en getoë in Nederland -- ek woon ook daar -- maar ek stel sedert 1989 geweldig baie belang in die Afrikaanse taal en kultuur. Vir dié wat in die negentiger jare na feite oor en boeke in die Afrikaanse taal en kultuur gedors het was dit nie altyd maklik om jou ding te doen nie. Maar ek dink tog ek het daarin geslaag om 'n goeie aantal van my jong jare af en toe te wy aan die bemeester van julle pragtige taal. Om die aksent reg te kry moes ek maar mooi luister vir skaarse opnames van pres. PW Botha en ds. Beyers Naudé, wanneer die Nederlandse media ons die kans gegun het om Afrikaans op die radio en televisie te hoor. Daar was mos 'n langdurige kulturele boikot deur Nederland gaande. Ek dink steeds dis 'n skande. Van 1994 af was dit gelukkig baie makliker om Afrikaans te hoor en om Afrikaanse taalboeke te kry, maar darem, "jong geleerd is oud gedaan!"

Dit is verblydend om te sien dat daar meer Kasies hier aktief is om bydraes aan hierdie ensiklopedie te lewer. Gesamentlik kan ons só, met die Afrikaanse gemeenskap, bydraes lewer aan die wonderlike Afrikaanse taal en kultuur! 'Afrikaans is mij ernst'.

U kan daarop vertrou dat my bydraes aan die Afrikaanse artikels op Wikipedia van 'n hoë gehalte sal wees omdat ek alreeds betrokke is by nl.wikipedia en omdat ek Afrikaans kan praat en skryf. Daar staan mos op my boekrakke baie Afrikaanse taalboeke wat staan en wag om geraadpleeg te word. Ek het hier, onder andere: die HAT, die Afrikaanse Woordelys en Spelreëls, Afrikaanse Sintaksis (deur Fritz Ponelis), Etimologiewoordeboek van Afrikaans (o.a. deur Helena Liebenberg), die Woordkeusegids ('n Kerntesourus van Afrikaans), Basiswoordeboek van Afrikaans, Afrikaanse Spreekwoorde en Uitdrukkings (deur Anton Prinsloo), Groot Tesourus van Afrikaans (deur De Stadler), en die nuutste aanwins van my verblyf in Port Elizabeth in Augustus: daardie tamaaie Pharos Woordeboek Engels-Afrikaans :: Afrikaans-Engels. Party van dié boeke het my baie gehelp.

Elke dan en wan kom ek by my vriende in Suid-Afrika (Port Elizabeth) kuier. Die twee laaste kere, in Augustus 2005 en in Julie en Augustus 2006, het ek die mense van Buro van die WAT op Stellenbosch en die Rhodes Universiteit op Grahamstad besoek en het ek enkele ander taalkundiges en liefhebbers van Afrikaans ontmoet om beter samewerking tussen Afrikaanses en Nederlandstaliges te bewerkstellig op die gebied van taal en identiteit. Terloops, my eindskripsie sal oor die fonologie van Blanke Suid-Afikaanse Engels handel.

Belangrik vir af.wikipedia: My belangstellings sluit in: taalkunde, kulture, geskiedenis, filosofie, politiek, ekologie en biologie (dier- en plantkunde). Ek beskou dit as 'n plig van die mens om die verskeidenheid van tale, kulture, politieke stelsels, lokale ekonomieë, ekologie en die aardse lewe te handhaaf. Die Westerse, neoliberale, mark- en geldbehepte wêreld is mos die oorsaak van die verdwyn van daardie verskeidenheid. Die druk wat Engels en die globalisering op Afrikaans uitoefen is van die gevolge daarvan. Met die internet kan ons darem 'n verskil maak en Wikipedia stel Afrikaanses daartoe in staat om hul intellektuele ontwikkeling in hul eie taal daar te stel.

Ek lees graag boeke van denkers soos Thom Hartmann, Roger Scruton, Nikolaj Berdyaev (Berdjajew, Berdyayev), Alain de Benoist, Armin Mohler, Joseph de Maistre en Ton Lemaire. Hulle is almal denkers met 'n effens tradisionalistiese uitkyk, met die einste besorgdheid oor die wêreld. Hulle gee nie net om vir die kulture en natuur in die wêreld nie, maar ook vir hul eie kultuur. En tale. My eie kultuur: dit is, wat my aanbetref, die Heel-Nederlandse (Nederland en België) en die Afrikaanse taal en kultuur.

Ek hou baie van die musiek van David Kramer, die Radio Kalahari Orkes en Anton Goosen. Naas Suid-Afrikaanse musiek hou ek baie van jazz, 20ste eeuse klassieke musiek en groepe soos Steely Dan, Jamiroquai, The Zawinul Syndicate, Pat Metheny Group, Yellowjackets, Mahavishnu Orchestra en Weather Report. Ek geniet baie van die werke van manne soos Michael Franks, John McLaughlin, Karol Szymanowski, Maurice Ravel, Claude Debussy, Frank Zappa, Richard Wagner, Maurice Duruflé en ander puik kunstenaars.

Op die oomblik studeer ek Engelse Taal en Kultuur en verskeie taalkundige vakke soos Indo-Europese Taal en Kultuur aan die Universiteit Leiden. Ek werk as 'n voorligter in die onderwys.

Kom maak gerus 'n draai op my webwerf, 'Die Roepstem': Die Roepstem / De Roepstem.

.

Groetnis,

Thiois 21:27, 31 Oktober 2006 (UTC)